I dashur lexues,

nëse e ndjen të nevojshme të bisedosh me dikë që mund të të kuptojë dhe mund t'i japë zgjidhje shqetësimit tënd, atëherë mos hezito të më kontaktosh këtu. Mesazhet do të lexohen vetëm nga unë dhe sekreti do të ruhet me seriozitetin maksimal.

Sinqerisht
Ardi


Si duhet bërë seks (për herë të parë)


Nuk ekzistojnë rregulla fikse, të cilave duhet t'i përmbahesh për të bërë seks të mirë. E rëndësishme është që seksi t'ju bëjë të ndiheni mirë. Mirëpo të "ndjerit mirë" duhet të zgjasë edhe pas seksit. Çfarë do të thotë kjo? Kjo do të thotë që pasi të keni bërë seks ju nuk duhet të ndiheni në ankth për rrezikun e ndonjë shtatzënie të padëshiruar apo infektimin me sëmundje ngjitëse. Prandaj, gjëja e parë për të cilën duhet të mendoni janë kontraceptivët dhe seksi i sigurt. Pasi të keni menduar mirë për këto aspekte, muntë të vazhdoni me pyetjet e tjera.

Kur duhet të bëjmë seks?
Kjo nuk ka shumë rëndësi. Ajo që ka rëndësi është që si ti, si partneri yt, të jeni të dy gati për ta bërë një gjë të tillë. Disa njerëzve u pëlqen të bëjnë dashuri në agim, disa të tjerëve pasdite, të tjerëve në errësirën e natës. Më shumë rëndësi se "kur-i?", ka "sa-ja?", pra koha që ju duhet të shpenzoni duke bërë seks. Kur bën seks për herë të parë, mirë është që të keni kohë të mjaftueshme në dispozicion. Fundjava është ideale, ose e pakta një ditë, përfshi dhe kohën e gjumit.


A mos duhet të hamë apo të pimë diçka përpara se të bëjmë seks?
Mirë është të mos hani rëndë se ka rrezik t'iu zërë gjumi. Hani lehtë. Mos konsumoni shumë alkool, mundësisht fare. Alkooli mund t’ju heqë ndrojtjen si për fillim, por nga ana tjetër vështirëson ereksionin (ngrehjen).

Ku duhet të bejmë seks?
Vendi që do të zgjidhni për të bërë seks është një nga zgjedhjet më të rëndësishme. Gjetja e një vendi ku të mund të jeni në intimitet të plotë, për rreth dyzetetetë orë, pa ndërprerje është e vështirë në atë moshë kur shumica e njerëzve planifikojnë të humbasin virgjërinë e tyre. Por ia vlen mundimi, ama! Makinat, p.sh, nuk kanë hapsirë të mjaftueshme për të bërë seks të rehatshëm, ndërsa qoshet nëpër ferra, me insekte, pluhur dhe gjemba pishash nuk lenë vend për shumë intimitet.

Shtrati është vendi më i përshtatshëm për të bërë dashuri. Më e mira është të keni një dhomë personale me të gjitha pajisjet që i nevojiten një dhome gjumi, përfshi këtu dhe pasionin, rehatinë, hapësirën, dhe sigurisht një tualet. Si fillim mund të bëni një dush së bashku! Pastaj prekni njëri-tjetrin. Njihuni me trupat tuaj. Mos u nxitoni! Kjo do të thotë të bësh dashuri.

Çfarë duhet të marrim me vete në këtë rast?
Merrni gjithçka që ju nevojitet për tu ndierë rehat, absolutisht gjithçka. Përdorni kontraceptivë (pilula ose prezervativë) sipas dëshirës suaj ose sipas këshillës së mjekut gjinekolog nëse ju zakonisht këshilloheni me një të tillë.

A do ta arrijmë orgazmën në të njëjtën kohë?
Orgazma nuk duhet të jetë shqetësimi juaj kryesor. Disa femra e arrijnë orgazmën pasi kanë fituar një farë përvoje, por edhe nëse ju të dy jeni të aftë të arrini orgazmën, shanset që ta arrini njëkohësisht janë shumë të pakta (99 % gjasa që nuk ndodh). Kënaquni dhe mos kini turp t'i tregoni njëri-tjetrit se çfarë ju pëlqen dhe ju kënaq vërtet.


PËR VAJZAT

Çfarë duhet të bëj më parë?

Nuk mund të presësh që partneri ta dijë se çfarë të bën të ndjehesh mirë. Duhet t'ia thuash ose t'ia tregosh duke marrë dorën e tij dhe duke e vendosur atje ku ndjen më shumë kënaqësi. Mos ki turp t'i kërkosh të jetë më i ëmbël apo që të ndryshoni pozicion atëherë kur e ndjen të nevojshme. Merrini gjërat shtruar. Nëse edhe ai e ka për herë të parë, atëherë mund të jetë i nervozuar dhe penisi i tij mund të mos reagojë që në fillim. Nevojitet durim, ëmbëlsi dhe mirëkuptim që gjithçka të kalojë pa problem. Edhe ti mund ta kesh të vështirë ta ndihmosh, prandaj ju këshilloj që t'i jepni vetes kohë, shumë kohë.

A do të më dhembë?
Ndoshta të ka rastisur të dëgjosh histori të tmerrshme se sa e dhimbshme mund të jetë humbja e virgjërisë. Për disa femra kjo është e vërtetë, por me partnerin dhe komunikimin e duhur mund të kesh një penetrim aspak të dhimbshëm. Mos e ngut partnerin. Mundësisht përdor një lubrifikues ( vetëm produkte profesionale, jo vaj gatimi, vazelinë apo vaj bebeje pasi këto mund të jenë të rrezikshme për shëndetin e organeve gjenitale). Në fillim fut gishtat e tij në mënyrë që të hapet vagina. Thuaji se kur të pëlqen dhe kur të dhemb.

Lubrifikuesi më i mirë është ai që vagina prodhon vet. Mënyra më e mirë për të lubrifikuar vaginën në mënyrë natyrale janë përkëdhelitë, puthjet dhe atmosfera e ngrohtë, pozitive. Kur trupi i femrës ndihet i relaxuar, atëherë edhe lubrifikimi bëhet më i lehtë.

Çfarë pozicioni duhet të përdor?
Shumë femra duan të rrinë sipër, nga që në atë pozicion mund të kontrollojnë drejtimin e penetrimit të penisit. Të tjerat duan të qëndrojnë poshtë dhe t'ia lënë të dashurit të tyre situatën në dorë. Zgjidh atë që është më e mirë për ty. Mos harro t'i thuash atij që të mos nxitohet dhe nëse e ndjen të nevojshme, përdor lubrifikues.

PËR DJEMTË

Por sikur të mos ngrehet?
Mund të duket qesharake, por është krejt normale që penisi yt, i cili deri tani ka punuar si mos më mirë, të futet në grevë pikërisht në momentin më të papërshtatshëm.

Kjo është e natyrshme, je nervoz. Merr frymë thellë. Bëj diçka tjetër. Përdor duart, buzët dhe gjuhën. Përpiqu ta harrosh sikletin dhe do të shikosh që penisi do të përgjigjet. Është thjesht diçka e përkohshme.

Duhet t'i them asaj që jam i virgjër?
Shumë meshkuj mendojnë se meqenëse janë të tillë (meshkuj), duhet patjetër ta kenë situatën nën kontroll, pavarësisht se kush ka më shumë eksperiencë. Nëse ti je i virgjër dhe ajo jo, thuaje. Lëre femrën të të drejtojë nëse është dakord. Kjo është një përvojë mësimore dhe dashurie. Mos ki turp nga e vërteta. Femra do të të kuptojë dhe do të të pranojë më shumë nëse e di që ngathtësia jote vjen nga mungesa e eksperiencës dhe jo nga paaftësia.

Po sikur të arrij orgazmën shumë shpejt?
Ka shumë gjasa që të ndodhë pikërisht kështu. Nëse e arrin orgazmën shumë më shpejt nga sa do të doje, qetësohu! Mos u ngut. Prit ndonjë orë dhe pastaj provoje sërish. Herën e dytë do të jesh më i qetë dhe i gatshëm për një marrëdhënie të kënaqshme.

E kam të madh sa duhet? E kam shumë të madh? Ka formën e duhur?
Gjatësia e penisit është një shqetësim shumë i përhapur tek djemtë. Normalisht gjatësia e penisit është diçka më shumë se 14 cm, në fazën e ereksionit dhe kjo mjafton për të prekur çdo qendër nervore të klitorit dhe vaginës, përfshi dhe pikën e famshme G. Vagina është në gjendje të zgjerohet për të pranuar një penis të madh, ose të përshtatet për një penis më të vogël. Madhësia e penisit ka të bëjë shumë pak me aftësinë tënde si “dashnor”.

Një çështje tjetër është forma. Disa meshkuj shqetësohen sepse penisi i tyre anon poshtë ose majtas dhe mendojnë se nuk janë normalë ngaqë nuk shikojnë forma të tilla në filmat erotikë. Të tjerët shqetësohen se përkulja poshtë do të krijojë vështirësi në seks pasi vagina nuk përshtatet me forma të tilla.

Mos harroni se mund të bëni seks në pozicione të ndryshme. Penisi dhe vagina mund të përshtaten në mënyra të ndryshme dhe se çdo pozicion i ri mund t'ju sjellë kënaqësi ty dhe partneres tënde. Disa njerëz mendojnë se një penis i anuar poshtë mund të krijojë lehtësi në seksin oral.

Do të jem një “dashnor” i mirë?
Të qenit “dashnor” i mirë nuk ndodh automatikisht. Me partneren, kohën, ledhatimet dhe praktikën e duhur, ke gjithçka që duhet për të qenë një partner i mrekullueshëm. Herët e para do të jenë disi të pakëndshme dhe të ngathëta, por ato do të jenë fillimi i çasteve të mëdha për pjesën tjetër të jetës

blog comments powered by Disqus
Related Posts with Thumbnails
Respektoni punën e të tjerëve.
Mos i vidhni artikujt e youalbania.com

Nëse doni të mbushni faqen tuaj me artikuj rreth seksit dhe dashurisë, bëjeni këtë nëpërmjet punës tuaj personale dhe jo duke vjedhur.